1Ti 6 | GbrGAW | STEP | Afyenu a Yesu viyi ɓa zhin oɓa dagayi tnu-tnu ɓai gaɓa mwamwa, fye to fa a ci ge a Kristi aza zhin a bwatoyi nun, fyeto ye a ma Shekwoyi eye san kwo owo ɓeda ntu n deye ɓo m.

1 Timothy 6

Tnu-tnu-n Agyiwye Yi

1 Afyenu a Yesu viyi ɓa zhin oɓa dagayi tnu-tnu ɓai gaɓa mwamwa, fye to fa a ci ge a Kristi aza zhin a bwatoyi nun, fyeto ye a ma Shekwoyi eye san kwo owo ɓeda ntu n deye ɓo m. 2 Ndei oɓa dagayi zhin Yesu viyi nu, kwo to wunu ge ɓa ɓa fa tnu-tnu zhin ɓon, kwo bmiya ɓa ɓahin yi nu ntuge zado dna gaiciya ga ɓa bwa bmazhin dna n ɓa tnu- tnu. Timatawus aɓeye nɓa zhin gaiciya nyi ha gna aza, ɓa vi ɓa. 3 Azaho ɓa na aɓeye ɓo, ama ɓanu zhin wuwu hin-hin Dagayi Yesu Kristi nya. Oɓa nu zhin tushi asese manayi nya. 4 Oza n wa da ɓedo gvo wo zhin aɓekwo nu, n za gbeloi, wo la pmiya n Kristi ɓeda, woi ze kwo aɓona n kwo ɓa zo fi n shewo, n minagyi yi n kwo ɓe n na agyekpei laifi zanshi n na aɓemwi nukwoyi. 5 Aɓenaiye n ɓa bugbai nunu yi n ɓenukwoyi, ɓa ta kpe gaiciya da m, n ɓa aba Nabari manayi zhin agyiwye bwa zokwo nu fye la bui ɓa si.

6 Ho cei pma ha zhin nyabwayi hin-hin? Ho la ze nyabwayi n gye ho zhin ɓemana lo hoi dagma. 7 Nshiinsun, yi to ɓei ɓe n na agyiwyei shin, esa n yi ɓei ɓe anyi n cei nyin. Yin to ɓei gmi n nyahoi shin esa n yi ɓa fin. 8 Ntu ce yiku eyi abugba zhin pi kwo to yi n na agyiwyei n, ndei yi n nyagyi yilo n na jekpeyi. 9 Ama aza nɓa ye ɓa bwa nya, sa fyewyi sai ɓa ya ɓenukwoyi zhin ntuge ɓa bwa agiwye, enya nkwo tuɓa eci, kwaze ɓa abugba nukwoyi zhin yi, kwa wu ɓa har ana pi. 10 Gama agyiwye ye nu zhin oza zhin a ɓenukwoyi aje. Azaho la avun pmi wu Shekwoyi ntu n na gyiwye ɓo, ntuce ɓaku ɓe ɓahin n bugba wun yi n mwa.

11 O, Timatawus, ho zhin Shekwoyi zanu, bu aɓo nukwoyi ye si vinya, ha zhin oɓo n kwo wu cewo n bmiya, hoi tumwi ha kpema wu, hoi ye azaje, ha zhin hankuri n mi bwai. 12 Shunkun ga Shekwoyi, la nyima wye-wyeyi nyalo-nyalo nya n Shekwoyi la gaho nyi. N ho ku kwo seida zhin n na za abye n mwa begye nyi.

13 Mi ga ho wyidna n Shekwoyi abye, n wo ga aza wye-wyeyi vinya nyi. N Yesu Kristi abye n wo ɓei ga seida manayi n tna dna n Bunti Bilatus abye nyi 14 nge ho nu aɓo vinya n wa gnaho ge ho zhin, n na abai to a bwa laifi n ho aban, har eyi Dagayi Yesu Kristi wa jeze ɓe. 15 Gama esa fyewyi Shekwoyi anabarkada n ikoda yi gmanyi, woɓa wu Kristi nʼshe bmana asu aje Esu Dagayi a dagayi aje nya. 16 Owo nu gmanyi n wo ta shan fin, n wo dna n buzangna yakwo n zanyi-kwoci ta mi wa wu viyi n woyi m. Zanyikwoci to shin wo gyen, woi ta shan wo gyen. Nwo aba, mwa-mwa n iko nyalo-nyalo amin.

17 Gna aza n ɓa n nyabwai nyi nge ɓato mwa ɓahin tukwon, to ɓa kpema oɓa nyabwan. N kwo ɓa zo esa fyewyi nyin, ama ɓa gma ɓai kpema Shekwoyi wye-wyeyi da, n wo gayi anya vinya n yi n cei pma ntu n yi agmada ɓo nyi. 18 Gna ɓa ɓa zhin apma n ɓa agyiwyei dna n ɓemana zhin. Ɓa ku ze anyabwai dna n ɓemana zhin, ɓai ga aza n ɓa gyisan lo n bugba bui-buyi, n shiri yi zhin ɓa gni n na azai enya n Shekwoyi wa ga ɓa. 19 Nɓa zhin nlai ɓa so nya bwa hin-hin shi nu nshemi, nyaso shi manayi nu nyalo-nyalo nya. Ɓa se ase manayi n kwo kunce n na a Yesu viyi n na anyi deye.

20 O, Timatawus, to gba a kala na ɓeye zhin yi, n Shekwoyi wa fi ho n na akun nyin. To vi aɓenai, a cije nya n ɓa gma n ɓa ɓeyekpe yi nyin. Ɓai wu nu nge ɓa to n ɓeyekpe yi lon. 21 Aza deye pya n ku gyi nya manayi san n ɓa asese, ɓata kpe Shekwoyi yen. Shekwoyi sun-sun gye kwo kunsun n hoi.